Төзелеш тармагының иң эре форумы – БРИКС Төзелеш атнасы беренче тапкыр Казанда 2026 елның 10-13 ноябрендә «Казан Экспо» мәйданчыгында узачак.
Чара федераль һәм региональ хакимият органнары вәкилләрен, БРИКС илләреннән һәм Бәйсез Дәүләтләр бердәмлегеннән (СНГ) әйдәп баручы девелоперларны, экспертларны һәм инвесторларны җыячак, тәҗрибә уртаклашу һәм халыкара хезмәттәшлекне үстерү өчен төп дискуссия мәйданчыкларының берсенә әвереләчәк.
БРИКС Төзелеш атнасы программасы базарның барлык төп юнәлешләрен колачлаячак – төзелештән һәм девелопменттан алып инвестицияләргә һәм сатуларга кадәр. Эшлекле программа кысаларында тармакның федераль һәм төбәк лидерлары катнашында пленар утырыш, шулай ук глобаль трендларга, дәүләт һәм бизнесның үзара хезмәттәшлегенә һәм кризиска каршы стратегияләргә багышланган тематик блоклар планлаштырылган.
Форумның оештыру комитетын РФ Төзелеш һәм торак-коммуналь хуҗалык министры Ирек Файзуллин һәм Татарстан Республикасы Рәисе Рустам Минниханов җитәкли.
ТР Дәүләт экспертизасының махсус партнер сыйфатында катнашуы оешманың югары статусын һәм аның төбәкнең төзелеш комплексын үстерүдә төп ролен ассызыклый. Учреждение директоры Рафар Шакиров берничә тапкыр билгеләп үткәнчә, бүген экспертиза контроль органы гына түгел, ә проектларны гамәлгә ашыруның барлык этапларында – проекттан алып эксплуатациягә кадәр – төзүчеләр өчен кирәкле консультант һәм ярдәмче булып тора. Бүгенге көндә ТР Дәүләт экспертизасы бирелгән бәяләмәләр күләме буенча Россия дәүләт экспертизалары арасында тотрыклы рәвештә лидерлар өчлегенә керә, шулай ук РФ Идел буе федераль округы дәүләт экспертизалары арасында 1 урынны алып тора.
«БРИКС Төзелеш атнасы - ул һөнәри диалог һәм иң яхшы тәҗрибәләрне күрсәтү өчен уникаль мөмкинлек. Безнең өчен үз эшләнмәләребезне тәкъдим итү генә түгел, ә тармак һәм дәүләт мәнфәгатьләрендә экспертиза механизмнарын камилләштерүне дәвам итү өчен бизнес һәм хезмәттәшләребезнең сорауларын ишетү дә мөһим», — ТР Дәүләт экспертизасы директоры Рафар Шакиров ассызыклады.
Атнаның төп вакыйгалары:
Тарихи җирлекләрдә шәһәр төзелеше буенча «РЕБУС 2026» IV Халыкара форумы;
BRICS Property Awards Халыкара девелопер премиясен тапшыру;
«Яшь белгеч — киләчәкне төзүче» яшьләр форумы;
Күчемсез милек һәм төзелеш материалларының масштаблы күргәзмәләре.
Тулырак программа һәм теркәлү рәсми сайтта мөмкин: https://bricsweek.ru/
